Inspektorati Kombëtar i Mbrojtjes së Territorit po vijon punën me prishjen e një objekti dykatësh në Pogradec, i cili ishte pengesë për zbatimin e projektit “Parku Ujor Drilon-Tushemisht”.
IKMT bën të ditur se, inspektorët e IKMT kanë gjetur mirëkuptimin e poseduesit të këtij objekti dhe puna është zhvilluar normalisht.
Parku Ujor Drilon-Tushemisht është atraksioni më i ri turistik që i shtohet qytetit piktoresk të Pogradecit.
Projekti synon ta transformojë zonën në një destinacion të pakrahasueshëm ekoturistik, i cili mund të nxisë investime në turizëm që rrisin, promovojnë dhe vënë në veprim burimet natyrore të cilat deri tani kanë qenë të pashfrytëzuara apo të nënshfrytëzuara.
Vitet e fundit Pogradeci është kthyer në një nga destinacionet e përhershme turistike ku me hijeshinë e liqenit, natyrën, kulturën, historinë, kulinarinë, tërheq turistë të shumtë vendas e të huaj në çdo stinë të vitit.
