Departamenti amerikan i shtetit heq nga lista e personave “non grata” Antal Roganin, shefin e kabinetit të kryeministrit hungarez Viktor Orban i sanksionuar gjatë administratës pararendëse të Joe Biden.
Vendimi u publikua nga Departamenti i Thesarit, ndërsa sekretari amerikan i shtetit Marko Rubio ia komunikoi këtë vendim në një bisedë telefonike edhe homologut të tij hungarez Peter Zijarto.
Siç thuhet në deklaratën për shtyp të Departamentit të Shtetit, Rubio u shpreh se vendimi për sanksionimin e zyrtarit të lartë hungarez nuk ishte në përputhje me interesat e politikës së jashtme të Shteteve të Bashkuara.
Ministri i jashtëm hungarez përshëndeti vendimin, ndërsa zëdhënësi i qeverisë Zoltan Kovaç tha se vendimi është shenjë se erërat në Uashington kanë ndryshuar.
Antal Rogan u vendos në listat e të padëshiruarve të Uashingtonit, në ditët e fundit të administratës Bajden, më 7 Janar.
Njeriu i afërt i kryeministrit Viktor Orban akuzohej nga Departamenti amerikan i shtetit se duke shfrytëzuar postin, kishte krijuar skema korruptive në sektorë strategjikë të ekonomisë së Hungarisë si energjia, për t’u pasuruar dhe për të forcuar ndikimin e tij dhe njerëzve të partisë qeverisëse ku bën pjesë.
