KLGJ do të vendos sot për fatin e gjyqtares së Elbasanit Enkeleda Kapedani, në një kohë kur Inspektori i Lartë i Drejtësisë, Artur Metani ka kërkuar shkarkimin për shkelje disiplinore, pas videove të publikuara në rrjetin social TikTok.
Dy ditë më parë u bën publike disa video të Kapedanit që kishte publikuar në Tik Tok në zyrën e saj në Gjykatën e Elbasanit apo edhe në ambiente të tjera.
ILD kërkoi menjëherë shkarkimin e saj pasi ka shkelur Kodin e Etikës Gjyqësore duke kryer sjellje të pahijshme dhe shkelur parimin e integritetit.
Në disa prej videove të publikuara dukej se si ajo brenda zyrës së Gjykatës filmonte veten nën ritmet e këngës “Mafia”. Ndërsa në disa video të tjera ajo shihet duke udhëtuar me automjetin e saj po në shoqërinë e ritmeve të tilla dhe këngëve të njohura nga reperat shqiptarë.
Mirëpo në një video ajo shihet se ngre gishtin e mesit, teksa shijon ritmet e muzikës në sfond. Më tej ajo bën edhe veprime sikur po gjuan me kallash, duke shoqëruar kështu tekstin e këngës që po dëgjon.
Kapedani u emërua kryetare e Gjykatës së Elbasanit në 30 shtator 2020, pas dorëheqjes së gjyqtarit Zihni Shahu. Në dhjetor 2019, ajo bëri bujë ne medie pasi ka liruar nga burgu Viktor Ymerin e bandës së Gaxhait.
