Një ngjarje e rëndë ka ndodhur sot në Prizren, ku janë ekzekutuar me breshëri plumbash një burrë dhe një grua. mediet fqinje raportojnë se kanë mbetur viktima burrë e grua, D. H. dhe S. H., të cilët janë gjetur pa shenja jete në banesën e tyre, në lagjen Ortakoll.
Sipas Prokurorisë Themelore të Prizrenit, në vendin e ngjarjes kanë dalur prokurori kujdestar së bashku me policinë dhe ekipin nga Instituti i Mjekësisë Ligjore, të cilët kanë konstatuar vdekjen e çiftit.
“Sipas dyshimeve të para të Prokurorisë, në trupat e viktimave janë vërejtur plagë të shkaktuara nga arma e zjarrit. Gjatë hetimit në vendin e ngjarjes, është gjetur një armë e zjarrit – pistoletë, për të cilën dyshohet se mund të jetë arma me të cilën është kryer vepra penale.
Me urdhër të prokurorit, trupat e pa jetë të viktimave janë dërguar për ekspertizë në Institutin e Mjekësisë Ligjore në Prishtinë”, thuhet në njoftimin për media.
Prokuroria Themelore në Prizren është duke i ndërmarrë të gjitha veprimet hetimore për zbardhjen e plotë të rastit.
