Policia e Shtetit ka marrë masa të posaçme për garantimin e rendit dhe sigurisë gjatë ndeshjes Shqipëri-Bjellorusi, e cila do të luhet sot në orën 20:45, në stadiumin “Air Albania”.
Për shkak të fluksit të tifozëve, nga ora 17:00 deri në përfundim të ndeshjes do të ketë kufizime të qarkullimit në disa rrugë pranë stadiumit.
Rrugët që do të bllokohen janë:
– Bulevardi “Dëshmorët e Kombit”, nga zona pranë urës së ish-Hotel Dajtit
– Rruga “Papa Gjon Pali II”, te kryqëzimi i RTSH-së
– Rruga “Dervish Hima”, pranë Ambasadës së SHBA-ve
– Rruga “Asim Zeneli”, pranë Ambasadës së SHBA-ve
– Rruga “Themistokli Gërmenji”, në hyrje
– Rruga “Ismail Qemali”, te kryqëzimi i RTSH-së
– Rruga “Lekë Dukagjini”, pranë ish-Gardës së Republikës. Ky aks do të përdoret vetëm nga mjetet e autorizuara nga FSHF-ja
– Rruga “Abdyl Frashëri”, pranë kryqëzimit të Librit Universitar
– Te sheshi “Wilson”, lëvizja do të devijohet drejt rrugës “Sami Frashëri”, pak para përfundimit të ndeshjes.
Ndërkohë, Rruga e Elbasanit, Unaza dhe bulevardi “Bajram Curri” do të qëndrojnë të hapura për qarkullimin.
Policia do të kryejë kontrolle të tifozëve para hyrjes në stadium. Nuk do të lejohet futja e fishekzjarrëve, flakadanëve, lëndëve piroteknike, monedhave metalike, çadrave, çakmakëve, karikuesve të celularëve dhe sendeve të tjera që mund të rrezikojnë sigurinë.
Tifozët këshillohen të paraqiten në stadium nga ora 18:30. Policia paralajmëron se, për shkak të fluksit, ata që mbërrijnë pak para fillimit të ndeshjes mund të kenë vështirësi për të hyrë në stadium.
Për garantimin e sigurisë janë angazhuar qindra punonjës policie, të cilët do të jenë në terren para, gjatë dhe pas ndeshjes.
