Parlamenti i Tajlandës ka zgjedhur biznesmenin Anutin Charnvirakul kryeministër, i treti në dy vite, pas një serie skandalesh dhe shkarkimesh politike që kanë tronditur vendin.
Javën e kaluar, Paetongtarn Shinawatra anëtare e familjes më të fuqishme politike në Tajlandë u shkarkua nga Gjykata Kushtetuese për shkelje etike, lidhur me mënyrën si trajtoi një mosmarrëveshje kufitare me Kamboxhian.
Largimi i saj vjen si pjesë e një rrotacioni të dhunshëm politik, ku Gjykata dhe ushtria kanë ndikuar shpesh në rrëzimin e qeverive. Familja Shinawatra, e cila ka sunduar politikën që nga viti 2001, pësoi një goditje të rëndë me ngjitjen në pushtet të Anutin, i cili u bashkua me Partinë Popullore një forcë progresive dhe e re në parlament për të formuar qeverinë e re.
Skandalet politike dhe përplasjet mes elitës konservatore-mbretërore dhe familjes Shinaëatra kanë ndezur tensionet, ndërsa ish-kryeministri Thaksin u largua për në Dubai për trajtim mjekësor, ndërkohë që përballet me një seancë gjyqësore që mund ta dërgojë sërish në burg.
Anutin, i njohur për liberalizimin e ligjeve mbi marijuanën dhe stilin pragmatik politik, do të duhet të përballojë sfidën e madhe për të qeverisur me një koalicion të brishtë dhe premtimin për zgjedhje të shpejta brenda katër muajve.
