Sekretari amerikan i Shtetit, Marco Rubio, njoftoi sanksione ndaj katër gjyqtareve të Gjykatës Ndërkombëtare Penale (GJNP), duke i akuzuar ato për “abuzim me pushtetin” dhe për hetime të njëanshme që, sipas SHBA-ve, shënjestrojnë padrejtësisht Shtetet e Bashkuara dhe Izraelin.
Gjyqtaret e përfshira në vendimin sanksionues janë Solomy Balungi Bossa (Ugandë), Luz del Carmen Ibáñez Carranza (Peru), Reine Adélaïde Sophie Alapini Gansou (Benin), Beti Hohler (Slloveni).
Dy prej tyre kanë autorizuar hetime ndaj zyrtarëve izraelitë për veprimet në Gaza, përfshirë një urdhër arresti për Kryeministrin Benjamin Netanyahu, ndërsa dy të tjerat kanë mbështetur hetime për veprimet e forcave amerikane në Afganistan.
Sanksionet përfshijnë ngrirje pasurie, ndalim udhëtimi dhe bllokim të transaksioneve në SHBA. Rubio theksoi se vendimi u mor për të mbrojtur interesat sovrane dhe ushtarake të SHBA-së dhe aleatëve të saj, duke e cilësuar veprimtarinë e GJNP-së si “politikisht të motivuar”.
Gjykata Ndërkombëtare Penale reagoi duke dënuar masën si ndërhyrje në pavarësinë e saj gjyqësore dhe theksoi se hetimet kryhen në përputhje me Statutin e Romës, traktati themelues i GJNP-së, i cili është ratifikuar nga mbi 120 vende, por jo nga SHBA apo Izraeli.
Ky zhvillim pritet të përkeqësojë më tej marrëdhëniet midis Uashingtonit dhe institucioneve ndërkombëtare të drejtësisë, sidomos në një kohë kur GJNP-ja po intensifikon hetimet për krime të dyshuara lufte në rajone si Gaza dhe Afganistani.
