Kryetari i grupit parlamentar të Partisë Socialiste, Niko Peleshi reagoi pasditen e sotme ndaj bllokimit të dhunshëm të seancës plenare të Kuvendit nga deputetë të opozitës.
Sipas tij, aktet e sotme të dhunës në Parlamentin e Shqipërisë nuk përfaqësojnë thjesht një aksion politik nga opozita, por janë një manifestim i qartë i dhunës së papranueshme, që tejkalon çdo veprim radikal të mëparshëm.
“Djegia e karrigeve është simbol i djegies së besimit të qytetarëve, pikërisht në ditët kur Shqipëria ka nevojë më shumë se kurrë për bashkimin e forcave në rrugën e hapur drejt Bashkimit Europian”, u shpreh Peleshi.
Sot, vijoi ai, nga ne pritet përgjegjshmëri, maturi politike dhe përkushtim ndaj reformave që përqafojnë vlerat europiane.
“Seanca parlamentare duhet të jetë tempull i etikës dhe respektimit të ligjit, dhe jo një skenë ku ligji shkelet dhunshëm. Deputetët tanë nuk janë aty për t’u përleshur me këmbë karrigesh, por për të debatuar me fjalë. Deputetit nuk mund t’i tolerohet asgjë që i ndalohet qytetarit të zakonshëm. Aq më tepër dhuna”, përfundoi kreu I grupit parlamentar socialist.
Seanca e sotme e Kuvendit u mbyll para kohe për shkak se deputetë të opozitës bllokuan foltoren e më pas nxorrën jashtë karriget e tyre dhe u vunë flakën në shenjë proteste ndaj dënimit të deputetit Ervin Salianji.
