Ka nisur gara politike për zgjedhjet e 11 Majit.
Partitë politike kanë ndezur motorët për të siguruar mandate në legjislaturën e re parlamentare me objektiv qeverisjen e vendit.
Partia Socialistesynon të marrë mandatin e 4-ërt me premtimin se do të anëtarësojë Shqipërinë në BE ndërsa koalicioni i drejtuar nga Partia Demokratike, Aleanca për Shqipërinë Madhështorekërkon të bëjë rotacionin dhe të marrë pushtetin pas 12 vitesh në opozitë.
Partitë e reja po paraqiten si alternative ndryshe nga dy forcat tradicionale politike që kanë qeverisur vendin dhe kërkojnë të jenë shpresa për shqiptarët e zhgënjyer.
Partia Socialiste me sloganin “Shqipëria 2030 në BE” sot në orën 17:00 nga Sheshi Skënderbej do e hapë fushatën me gratë, në një lidhje paralele online nga 12 qarqet e vendit.
Por hapja e madhe zyrtare e socialistëve do të jetë të Shtunën në orën 12:00, po në Sheshin Skënderbej.
Demokratët me sloganin “Për Shqipërine Madhështore” sot në orën 19:00 do të hapin fushatën në Sheshin “Nënë Tereza”. Sali Berisha kërkon rikthimin në pushtet dhe premton luftë ndaj korrupsionit, ekonomi më të fortë dhe drejtësi për qytetarët.
Pjesë e fushatës së demokratëve do të jetë edhe amerikani Chris LaCivita për të cilin Berisha beson se është arkitekti i fitores më 11 Maj.
Në këto zgjedhje çdo forcë apo koalicion, sipas formulës së re elektorale, ka 186 kandidatë për deputetë, ku 46 janë nga lista e mbyllur dhe 140 nga lista e hapur.
Kanë të drejtë vote mbi 3.7 milionë qytetarë, ndërsa për herë të parë voton edhe diaspora.
