Numri i të vdekurve të nxjerrë nga rrënojat e një ndërtese 21-katëshe e cila u shemb më 1 nëntor në qytetin tregtar të Nigerisë, Lagos, është rritur në 36, transmeton Anadolu Agency (AA).
Koordinatori Shtetëror në Lagos i Agjencisë Nigeriane të Menaxhimit të Emergjencave (SEMA), Ibrahim Farinloye, në një deklaratë me shkrim tha se përpjekjet e shpëtimit po vazhdojnë në lidhje me aksidentin që ndodhi në rajonin Ikoyi të Lagosit më 1 nëntor.
“Deri më tani janë gjetur trupat e 33 burrave dhe 3 grave dhe 9 persona janë plagosur”, tha Farinloye.
Duke theksuar se vlerësohet se shumë njerëz kanë mbetur nën rrënoja, Farinloye tha se përpjekjet e kërkim-shpëtimit vazhdojnë.
Nuk dihet se çfarë e shkaktoi shembjen e një pjese të kantierit dhe ndërtesës, ku ndodhen apartamente dhe shtëpi luksoze dhe sa persona kanë mbetur nën rrënoja.
Drejtor i Përgjithshëm i Agjencisë së Kontrollit të Ndërtesave në Lagos, Gbolahan Oki, në një deklaratë tha se qeveria i dha kontraktorit lejen për një ndërtesë 15-katëshe, por u ndërtua ndërtesë 21-katëshe.
Oki deklaroi se kontraktori u arrestua dhe u dërgua në gjykatë.
