Norman Tebbit, ish-ministër i kabinetit konservator dhe një nga aleatët më të afërt të Margaret Thatcher, ka ndërruar jetë në moshën 94-vjeçare.
Lajmin e bëri të ditur i biri, William Tebbit, i cili në një deklaratë zyrtare tha:
“Në orën 23:15 të datës 7 korrik 2025, Lord Tebbit ndërroi jetë i qetë në shtëpinë e tij, në moshën 94-vjeçare. Familja kërkon që privatësia e tyre të respektohet në këtë kohë zie. Një njoftim i mëtejshëm për ceremoninë mortore do të jepet në vijim.”
Tebbit përfaqësoi zonat elektorale Epping dhe Chingford për 22 vjet si deputet konservator. Në vitin 1992, ai u nderua me titullin Lord Tebbit i Chingford-it, duke hyrë në Dhomën e Lordëve, nga ku u tërhoq në vitin 2022.
Gjatë karrierës së tij politike të gjatë, Tebbit mbajti disa poste të rëndësishme, duke përfshirë ato të sekretarit për punësimin, sekretarit për tregtinë dhe industrinë, kancelarit të Dukatit të Lancasterit dhe kryetarit të Partisë Konservatore.
I njohur për qëndrimet e tij të ashpra, Tebbit u bë figurë kyçe në përballjen me sindikatat gjatë mandatit të tij si sekretar për punësimin. Si kryetar i partisë konservatore nga viti 1985 deri më 1987, ai luajti një rol të rëndësishëm në sigurimin e fitores së tretë zgjedhore për kryeministren Thatcher.
Në vitin 1984, Tebbit u plagos rëndë nga shpërthimi i bombës në hotelin Brighton, një atentat i organizuar nga IRA gjatë konferencës vjetore të Partisë Konservatore. Gruaja e tij, Margaret, mbeti e paralizuar nga qafa e poshtë si pasojë e sulmit.
Norman Tebbit do të mbahet mend si një figurë e fortë dhe e paepur e politikës britanike konservatore, i devotshëm ndaj idealit të tij politik dhe ndaj lidershipit të Margaret Thatcher.
