Gjykata Kushtetuese ka shqyrtuar sot ankimimin e paraqitur nga kryetari i Partisë Demokratike, Sali Berisha, i cili e kundërshton si antikushtetuese masën e sigurisë “Detyrim paraqitje”.
Sipas medieve, seanca e sotme u zhvillua pa praninë e palëve, ndërsa gjyqtarët bënë analizë në bazë të të dhënave shkresore.
Berisha kundërshton masën e dhënë nga SPAK, atë të “detyrim paraqitjeje”, pasi sipas tij, për shkak se ishte deputet, do duhej që në fillim të ishte mbledhur Këshilli i Mandateve.
Me vendimin ndaj kërkesës së Berishës, Gjykata Kushtetuese vendos precedent nëse do kërkohet për masat e tilla autorizimi pranë Kuvendit apo jo.
Në 6 nëntor, Gjykata Kushtetuese rrëzoi me shumicë votash kërkesën e kryetarit të Partisë Demokratike Sali Berisha për përjashtimin e gjyqtares Kushtetuese, Marsida Xhaferllari nga shqyrtimi i ankimit të tij në Kushtetuese.
Në kërkesën e depozituar nga avokatët e Berishës pretendohej se Xhaferllari është bashkëjetuese e Enkeljed Alibeaj dhe shqyrtimi i çështjes nga ajo përbën konflikt interesi.
