GJKKO ka pranuar kërkesën e SPAK dhe ka kaluar për gjykim dosjen ndaj ish-sekretarit të ministrisë së Mjedisit, për akuzën e korrupsionit të zyrtarëve publikë në lidhje me hetimet për inceneratorin e Tiranës.
Prokuroria e Posaçme ka dyshime se Bllako është i përfshirë në dy raste korruptive për të favorizuar biznesmenin Klodian Zoto mbi procedurat e ngritjen dhe ndërtimin e këtij inceneratori.
Nga hetimet, ka rezultuar se Bllako në cilësinë e sekretarit të ministrisë së Mjedisit ka përfituar shumën prej 120 mijë euro për favorizimin që i ka bërë dy pronarëve që përfituan të drejtën për ndërtimin e inceneratorit, Klodian Zotos e Mirel Mërtirit.
Ndërsa në rastin e dytë, ka rezultuar se Bllako i ka kërkuar rryshfet Klodian Zotos, shumën prej 7.5 milionë Lekësh për llogari të Vladimir Bezhanit, duke e punësuar atë fiktivisht tek shoqëria “Integrated Technology Services”.
Sipas hetimeve, Vladimir Bezhani në vitin 2017-të u caktua këshilltar i jashtëm i ministrit të mjedisit Lefter Koka. Prokuroria thotë se Bllako ka orientuar Bezhanin që t’i japë informacione Klodian Zotos për procedurat që duhet të ndiqte për ngritjen e Inceneratorit të Tiranës.
Në muajin prill të këtij viti, SPAK çoi për gjykim një pjesë të të akuzuarve për inceneratorin e Tiranës mes të cilëve edhe ish ministrin e mjedisit Lefter Koka, si dhe disa ish-zyrtarë të bashkisë së Tiranës dhe anëtarë të komisionit të vlerësimit të ofertave.
