Kryetarja e Këshillit të Shtetit, Katerina Sakellaropoulou është zgjedhur presidente e vendit duke u bërë presidentja e parë femër në Greqi.
Në raundin e parë të votimit ku Sakellaropoulou mori pjesë si kandidate e vetme “pro” votuan 261 deputetë nga 294 sa ishin të pranishëm në sallën e Parlamentit prej 300 vendesh.
Në votimin ku opozitarët nuk paraqitën kandidat, krahas ND kanë votuar “pro” edhe Partia e Aleancës së Majtë radikale (SYRIZA) dhe Partia e Lëvizjes për Ndryshim (KİNAL). Ndërkohë që kanë abstenuar deputetët nga Partia Komuniste e Greqisë (KKE), Partia për Zgjidhje e Greqisë (ELY) dhe partia Mera25 në kryesimin e ish-ministrit të Financave, Yanis Varufakis të cilët kanë kundërshtuar kandidimin e Sakellaropoulou.
Sipas ligjeve të Greqisë, gjatë zgjedhjes së presidentit, nuk parashihet që deputetët të votojnë “kundër”.
Në këtë mënyrë Sakellaropoulou bëhet presidentja e parë femër e vendit. Ajo do të marrë detyrën e saj me një mandat 5 vjeçar duke bërë betimin më 14 mars, pas përfundimit të detyrës së presidentit aktual grek, Prokopis Pavlopoulos më 13 mars.
Presidentja e re e Greqisë, Sakellaropoulou ka lindur në Selanik në vitin 1956. Pas përfundimit të Fakultetit të Drejtësisë në Universitetin e Athinës ajo vazhdoi masterin në Univesitetin Sorbonne në Francë për ligjin kushtetues dhe administrativ.
Në vitin 1982 Sakellaropoulou u emërua si raportuese në Këshillin e Shtetit ndërsa në vitin 2018 ajo u emërua kryetare.
