Regjimi i Bashar al-Assadit vazhdon sulmet e tij pavarësisht se Rusia ka pretenduar për shpalljen e armëpushimit në Idlib të Sirisë.
Ministria ruse e Mbrojtjes ka njoftuar se në rajonin e Idlibit në Siri ka filluar dje zbatimi i armëpushimit nga ora 14:00 sipas kohës lokale.
Por, regjimi i Assadit dje pas orës së armëpushimit të shpallur kreu sulme artilerike, raketore dhe me armë tokë-tokë në pjesën jugore dhe juglindore të komunës Maarratunnuman të Idlibit, si dhe ndaj fshatrave Maar Shurin, Marshimshe, Tel Mennis dhe Bebbile.
Gjithashtu edhe sot forcat e regjimit kanë kryer sulme artilerike ndaj rajoneve Maarratunnuman dhe Tel Mennis. Ndërkohë që fshati Maar Shurin ka qenë objektiv i sulmeve ajrore edhe tokësore.
Po ashtu forcat e regjimit kanë filluar sulme me qëllim përparimin tokësor në vijën Tuh-Deyr Sharki dhe Xherxhenaz-Tel Mennis në linjde të komunës Maarratunnuman.
Gjatë takimit të Turqisë, Rusisë dhe Iranit në maj të vitit 2017 në Astana të Kazakistanit, Idlibi u shpall zonë e de-eskalimit, ku aktet e agresionit do të ndaloheshin.
Turqia dhe Rusia arritën një marrëveshje shtesë në shtator të vitit të kaluar në Soçi si pasojë e shkeljes së armëpushimit nga ana e regjimit sirian.
Megjithatë, forcat e regjimit me ndihmën e mbështetësve i kanë vazhduar sulmet e tyre pavarësisht marrëveshjes. Që nga ajo datë, mbi 1.600 civilë kanë humbur jetën si pasojë e sulmeve dhe rreth 1.3 milionë të tjerë janë zhvendosur nga vendet e tyre.
