Deputetët britanikë dhanë sot, gjatë një votimi historik pas tre viteve e gjysmë krizë, miratimin e tyre final për tekstin që do t’i mundësojë Britanisë së Madhe të largohet nga Bashkimi Europian më 31 janar.
Dhoma e Komuneve, e dominuar gjerësisht nga konservatorët e kryeministrit, Boris Johnson, miratoi tekstin me 330 vota pro dhe 231 kundër.
Pas shqyrtimit nga Dhoma e Lordëve (Dhoma e Lartë e Parlamentit) javën e ardhshme, dhe pas miratimit të mbretëreshës, teksti, që kthen në ligj marrëveshjen e Brexit , do të ratifikohet nga Parlamenti Europian më 29 janar.
Pas tre viteve e gjysmë krizë dhe bllokimesh, rruga tashmë është e hapur për kapërcimin e madh më 31 janar.
Ky votim me pasoja historike për Britaninë e Madhe është eklipsuar pak si pasojë e aktualitetit nga tronditja e “Megxit”, vendimi i Harryt dhe Meghan për t’u tërhequr nga familja mbretërore./ATSH
