Sekretari i Shtetit i ShBA-së, Marco Rubio, është takuar me presidentin e Serbisë, Aleksandër Vuçiç, në kuadër të Asamblesë së Përgjithshme të Kombeve të Bashkuara në New York.
Sipas Departamentit të Shtetit, takimi u përqendrua te thellimi i partneritetit mes dy vendeve dhe nisja e një dialogu strategjik dypalësh, që pritet të zhvillohet së shpejti.
Në agjendë ishte gjithashtu edhe pjesëmarrja e SHBA-ve në panairin ndërkombëtar EXPO 2027, i cili do të mbahet në Beograd.
Vuçiç falënderoi SHBA-të për rolin e saj në garantimin e sigurisë së popullit serb në Kosovë përmes pranisë së trupave amerikane në misionin e KFOR-it. Ai e përshkroi takimin si “të rëndësishëm dhe domethënës”, duke theksuar se fokusi i bisedimeve ishte ekonomia, tregtia dhe çështjet e sigurisë.
“Diskutuam për përmirësimin e bashkëpunimit ekonomik, trajtimin e tarifave amerikane, mundësinë e investimeve të reja, si dhe bashkëpunimin në sektorin e energjisë dhe teknologjisë,” deklaroi presidenti serb.
Ai shtoi se Serbia vlerëson mbështetjen e SHBA-ve në rrugën drejt anëtarësimit në Bashkimin Europian, që sipas tij mbetet një nga objektivat strategjikë të vendit.
Vuçiç përfundoi deklaratën duke nënvizuar se “një dialog i hapur dhe i sinqertë, i bazuar në besim dhe respekt të ndërsjellë, është mënyra më e mirë për të forcuar marrëdhëniet mes dy vendeve”.
