Kryetari i Bashkisë së Shkodrës Benet Beci ka reaguar lidhur me ngjarjen e rëndë që tronditi mëngjesin e sotëm qytetin verior.
Në një postim në rrjetet sociale, Beci tha se kjo ngjarje duhet të marrë ndëshkimin e ashpër të ligjit dhe shtoi se kishte biseduar me ministrin e Brendshëm Ervin Hoxha pas asaj që ndodhi.
“Të dashur qytetarë, ky mëngjes për Shkodrën nuk ishte ai i zakonshmi, siç ndodh çdo ditë në qytetin tonë. Një ngjarje kriminale që duhet të marrë ndëshkimin e ashpër të ligjit ka tronditur zemrën e qytetit.
Kam kontaktuar me Ministrin e Brendshëm dhe me të gjitha strukturat që luftojnë krimin, në emër të jetës dhe sigurisë së qytetarëve të Shkodrës, të cilët nuk meritojnë të përballen me skena të tilla.”, shkruan kryebashkiaku.
Ky reagim vjen pasi një atentat me armë zjarri ka ndodhur këtë mëngjes në qytetin e Shkodrës, ku dy persona kanë humbur jetën dhe dy të tjerë kanë mbetur të plagosur.
Ende nuk dihen shkaqet e kësaj ngjarje mafioze që tronditi këtë mëngjes qytetin e Shkodrës.
Paraprakisht dyshohet se shënjestra kryesore e atentatit ka qenë njëri prej të plagosurve, i cili ndodhet aktualisht në spital.
