Instituti i Mjekësisë Ligjore tashmë është pajisur me një laborator të ri toksikologjik, i ndërtuar dhe pajisur sipas standardeve më të larta europiane. Inaugurimi u bë këtë të shtunë, më 6 shtator, nga Ministri i Drejtësisë, Ulsi Manja, i cili e cilësoi këtë si një “premtim të mbajtur”.
“Premtim i mbajtur! Sot inauguruam Laboratorin e ri Toksikologjik në Institutin e Mjekësisë Ligjore, të pajisur me teknologjinë më moderne që e vendos këtë institucion në nivel shkencor bashkëkohor, sipas standardeve të BE-së. Ky investim vjen pas ristrukturimit të godinës së IML-së, duke e transformuar atë në një shërbim modern dhe efikas, në funksion të drejtësisë!”, tha Manja.
Ky laborator pritet të rrisë ndjeshëm kapacitetet teknike dhe shkencore të Institutit të Mjekësisë Ligjore, veçanërisht në analizat toksikologjike, të cilat janë kyçe në çështje penale, hetimore dhe gjyqësore.
