Mamaja e bashkëshortes së kryebashkiakut Erion Veliaj, Valbona Xoxa është paraqitur këtë paradite në ambientet e Prokurorisë së Posaçme Kundër Korrupsionit dhe Krimit të Organizuar.
Raportohet se mamaja e Ajolës, Valbona Xoxa ka qëndruar për rreth 1 orë në SPAK. Pas daljes nga Prokuroria e Posaçme, Valbona Xoxa nuk ka preferuar të japë asnjë prononcim për mediat.
Sipas të njëjtave burime, ajo është thirrur për të dhënë shpjegime sa i takon hetimeve që po kryen SPAK në lidhje me pasurinë e Erion Veliajt dhe bashkëshortes së tij, Ajola Xoxa.
Sa i përket ankimit të Ajola Xoxës për kundërshtimin e vendimit të GJKKO-së për sekuestrimin e sendeve, gjyqtarja Ilirjana Olldashi e caktuar për këtë çështje ka paraqitur aktin “raport për paaftësinë e përkohshme në punë”. Olldashi është zëvendësuar me gjyqtarin Engert Pëllumbi për shqyrtimin e ankimit në fjalë. Shpallja e vendimit për çështjen në fjalë është caktuar për sot në orën 15:00.
Ndërkohë, këtë mëngjes është paraqitur në SPAK edhe biznesmeni Gentian Sula. Ai nuk pati një komunikim për mediat pas përfundimit të dëshmisë, por mësohet se ai është pyetur përsa i përket hetimeve të Prokurorisë për pasurinë e Erion Veliajt.
Kujtojmë se ndaj biznesmenit Sula është caktuar masa e sigurisë “detyrim për t’u paraqitur” të premten e parë dhe të katërt të çdo muaji në orën 14:00. Ai akuzohet nga SPAK si i dyshuar për kryerjen e veprës penale “Korrupsioni aktiv i funksionarëve të lartë shtetërorë ose të zgjedhurve vendorë” në lidhje me dosjen e kryebashkiakut Erion Veliaj.
