Një ditë pas ngjarjes së rëndë që tronditi Malishevën, ku dhëndri i familjes i mori jetën me armë zjarri dy vëllezërve Driton dhe Naim Morina, policia ka arrestuar të dyshuarin.
Lajmi u konfirmua nga drejtori i Drejtorisë Rajonale të Policisë në Gjakovë, Lumni Graishta.
I dyshuari me inicialet A.I. ka marrë trajtim të parë mjekësor në Qendrën e Mjekësisë Familjare në Malishevë, pasi kishte mbetur i plagosur gjatë përleshjes. Për shkak të gjendjes së tij shëndetësore, ai është transferuar më pas në QKUK për trajtim të mëtejshëm.
Krimi i rëndë ndodhi mesditën e së enjtes së 6 nëntorit në fshatin Golluboc të komunës së Malishevës, kur i dyshuari me inicialet A.I, vrau para shtëpisë së tyre vëllezërit Driton dhe Naim Morina. I dyshuari ishte një emër i njohur për forcat e rendit, pasi më herët ishte akuzuar për veprat penale “Dhunë në familje” dhe “Kanosje”.
