Ursula von der Leyen i mbijeton dy votëbesimeve në Parlamentin Europian, duke fituar më shumë mbështetje sesa pritej nga shumë prej mbështetësve dhe kritikëve të saj.
Siç shkruan Politico, një shumicë e madhe e anëtarëve të Parlamentit Europian, të cilët votuan të enjten, 9 tetor, për dy mocione, një nga e Majta dhe një nga grupi i ekstremit të djathtë Patriotët për Europën, mbështetën presidenten e Komisionit Europian nga qendra e djathtë.
Pak njerëz parashikuan seriozisht se ajo do të humbiste, por madhësia e fitores tregon për forcimin e pozicionit të saj.
Për mocionin e ekstremit të djathtë, pati 179 vota pro, 378 kundër dhe 37 abstenime. Për mocionin e ekstremit të majtë, u hodhën 133 vota pro, 383 kundër dhe 78 abstenime. Rezultati tregon se kundërshtarët centristë të von der Leyen, ata që fillimisht e mbështetën presidencën e saj, u rreshtuan sërish pas saj kur situata u bë kritike.
Nëse do të kishte humbur ndonjërën nga votimet, Ursula von der Leyen dhe pjesa tjetër e Komisionit të saj do të detyroheshin të jepnin dorëheqjen, duke e futur BE-në në kaos në një moment kritik.
Blloku po përballet me një nga periudhat më të pasigurta në historinë e tij, me politikanë populistë dhe euroskeptikë që po marrin pushtetin ose janë shumë pranë tij në disa nga vendet anëtare, ndërsa Rusia po zhvillon luftë në Ukrainë dhe po kërcënon kufijtë lindorë të Europës.
“E vlerësoj thellësisht mbështetjen e fortë të marrë sot”, shkroi von der Leyen në X disa minuta pas votimeve.
Ishte një rezultat katastrofik për kampin kundër von der Leyen. Mocioni i mosbesimit nga ekstremi i djathtë mori vetëm katër vota më shumë sesa një përpjekje e ngjashme në korrik.
Mocioni i së Majtës pati një rezultat edhe më të dobët se ai i ekstremit të djathtë. Një zyrtar i grupit të Majtë i tha Politico-s para votimit se arritja e 200 votave do të konsiderohej një rezultat i mirë. Si shenjë e besimit të vazhdueshëm në lidershipin e von der Leyen, Socialistët ruajtën mbështetjen e tyre për të.
