Ministria në Twitter tha se forcat komando turke tashmë janë në rajonin e Haftaninit në Irak, duke shtuar se operacioni është duke u zhvilluar në mënyrë që të neutralizohet PKK dhe elementet e tjerë terroristë që kërcënojnë sigurinë e njerëzve dhe kufijve të Turqisë.
Komandot turke të mbështetura nga Forcat Ajrore, helikopterët ATAK, mjetet ajrore pa pilot (UAVs) dhe mjetet luftarake pa pilot (UCAVs) kanë hyrë në rajon.
Sipas burimeve të sigurisë, forcat turke goditën mbi 150 caqe të grupit terrorist të PKK-së në rajon me obusë dhe raketahedhës.
Pas sulmeve ajrore, komandot turke po ashtu kryen një operacion të infiltrimit përmes tokës dhe ajrit në objektivat terroriste.
“Ju gjithmonë keni treguar fuqinë e komandos turke, ne besojmë se do ta tregoni edhe një herë në ato male sot dhe do të bëni histori ashtu siç keni bërë më parë”, u tha ministri turk i Mbrojtjes Hulusi Akar komandantëve të trupave.
Ministria po ashtu shpërndau skenat fillestare të operacionit në një video.
Të hënën, ministria njoftoi fillimin e operacionit “Kthetra-Shqiponja” në Irakun verior, duke përmendur se avionët luftarakë turq shkatërruan shpellat ku terroristët strehoheshin dhe shpellat u shembur mbi to.
Operacioni u realizua kundër bazave terroriste në Sincar, Kandil, Karacak, Zap, Avasin-Basyan dhe Hakurk.
Në fushatën e saj mbi 30 vjeçare terroriste kundër Turqisë, PKK, e renditur si një organizatë terroriste nga Turqia, SHBA dhe Bashkimi Evropian, ka qenë përgjegjëse për vdekjen e afër 40.000 personave, përfshirë gra, fëmijë dhe foshnje.
