Të paktën 56 njerëz janë plagosur pas një shpërthimi në një fabrikë të fishekzjarreve në provincën Sakarya në Turqinë veriperëndimore.
Sipas autoriteteve në vendngjarje janë dërguar disa dhjetra ekipe zjarrfikësish dhe ambulanca.
Guvernatori i Sakarya, Çetin Oktay Kaldırım tha se në momentin e shpërthimit në fabrikë ndodheshin rreth 150 deri 200 punëtorë dhe se fabrika kishte në depot e saj afro 110 ton fishekzjarre.
Kaldırım tha se të plagosurit janë dërguar në spital dhe se për momentin nuk ka humbje jete. Megjithatë mediat turke thonë flasin edhe për viktima.
Ndërkohë, kreu i Gjysmëhënës së Kuqe Turke Kerem Kınık u ka kërkuar banorëve të Hendek të qëndrojnë në shtëpi dhe të mbyllin dritaret dhe dyert në përpjekje për të parandaluar efektet negative të tymrave toksikë dhe gazrave kimikë.
Nga ana tjetër, siç bëhet e ditur, ministri i Brendshëm, Süleyman Soylu, ministri i Shëndetësisë, Fahrettin Koca dhe ministrja e Familjes, Punës dhe Shërbimeve Sociale, Zehra Zümrüt Selçuk, janë nisur drejt zonës së fatkeqësisë.
