Të paktën 13 persona, përfshirë 11 fëmijë, u vranë në sulmet ajrore që i atribuohen forcës ajrore pakistaneze në zonat e Afganistanit lindor pranë kufirit midis dy vendeve, sipas autoriteteve dhe qeverisë de facto të talebanëve.
Kabuli akuzoi Islamabadin për një tjetër shkelje të hapësirës ajrore afgane, në një kohë tensionesh të larta në marrëdhëniet midis dy shteteve fqinje.
Zabihullah Mujahid, një zëdhënës i qeverisë de facto të talebanëve, tha në një postim në platformën X se bombardimet ndodhën të martën në mbrëmje në provincat Kunar, Khost dhe Paktika.
“Mbrëmë, ushtria pakistaneze shkeli përsëri hapësirën ajrore afgane dhe bombardoi shtëpitë e civilëve në provincat Kunar, Khost dhe Paktika”, tha ai.
Sipas tij, sulmet vranë 11 fëmijë, një grua dhe një burrë i moshuar, ndërsa 14 persona të tjerë u plagosën. Ai sqaroi se të plagosurit janë kryesisht gra dhe fëmijë.
Një zyrtar në provincën Khost, tha se një nga sulmet ajrore goditi një shtëpi, duke vrarë nëntë persona.
Një banor në provincën Paktika tha se një sulm i dytë ajror vrau tre persona të tjerë.
Informacionet nga autoritetet lokale dhe banorët përkojnë me vlerësimin se viktimat ishin civilë që ishin në shtëpitë e tyre gjatë sulmeve.
Incidenti vjen në një kohë marrëdhëniesh veçanërisht të tensionuara midis Pakistanit dhe Afganistanit, me të dyja palët që akuzojnë shpesh njëra-tjetrën për çështje sigurie përgjatë kufirit të tyre të përbashkët.
Qeveria talebane ka denoncuar vazhdimisht operacionet ushtarake pakistaneze brenda territorit afgan, ndërsa Islamabadi akuzon grupet e armatosura që veprojnë nga Afganistani për sulme ndaj objektivave pakistaneze.
Deri më tani, nuk ka pasur asnjë deklaratë zyrtare nga autoritetet pakistaneze mbi bombardimet e denoncuara nga Kabuli.
