Komisioni për Ekonominë dhe Financat miratoi projektligjin “Për miratimin e rritjes së kuotës së Republikës së Shqipërisë në Fondin Monetar Ndërkombëtar”.
Zëvendësministrja e Financave, Adela Xhemali bëri të ditur se projektligji ka si qëllim përmbushjen e detyrimeve të shtetit shqiptar kundrejt institucioneve financiare ndërkombëtare.
Në rezolutën 79-1 të Bordit të Guvernatorëve të FMN-së është vendosur rishikimi i gjashtëmbëdhjetë i kuotave të vendeve anëtare.
“Sipas kësaj rezolute, Republikës së Shqipërisë i propozohet t’i rritet kuota, nga 139.3 milionë SDR (të drejta të tërheqjes speciale) në 209.0 milionë SDR. Ky propozim vjen si pasojë e rëndësisë dhe rolit të këtij institucioni financiar ndërkombëtar në përmbushjen e programit të qeverisë shqiptare”, deklaroi Xhemali.
Fondi Monetar Ndërkombëtar ka akorduar dy kredi për mbështetje buxhetore, në vitet 2014 dhe 2020, me shumë totale 434.72 milionë SDR.
Të dyja këto kredi janë disbursuar plotësisht (respektivisht në 2014 dhe 2020) dhe janë në fazën e ripagimit, në përputhje me kushtet e marrëveshjeve. Balanca e kredive, (stoku) më 31.7.2024 ishte 134.28 milionë SDR.
