Dy persona janë arrestuar në lidhje me sherrin mes fqinjëve në Durrës. Në pranga kanë rënë fëmijët e dy familjeve që u përfshinë në konflikt.
Në lagjen nr. 15 të Spitallës ka ndodhur një konflikt mes dy familjeve, ku janë përfshirë babë e bir nga të dyja palët.
Nga njëra anë: M. D. (47 vjeç) dhe i biri A. D. (23 vjeç).
Nga ana tjetër: A. E. (46 vjeç) dhe i biri R. E. (22 vjeç).
Gjatë sherrit, R. E. dyshohet se ka goditur me thikë M. D, ndërsa A. D. ka goditur me grushte A. E., duke i shkaktuar dëmtime në fytyrë.
Si pasojë, M. D., i plagosur me thikë, dhe A. E., i goditur me grushte, kanë përfunduar në spital dhe po mbahen nën kujdesin e mjekëve.
Dy fëmijët e tyre kanë shkuar në qeli. 22-vjeçari R.E akuzohet për veprat penale “Plagosja e rëndë me dashje” dhe “Prodhimi, mbajtja, blerja apo shitja pa leje e armëve të ftohta”.
Ndërsa A. D., 23 vjeç, banues në Durrës, për veprën penale “Plagosja e rëndë me dashje”.
