Një kombinim perfekt. Recetë ideale për ta provuar dhe shijuar në familje. Kungujt e njomë të stinës i shohim përditë në treg, të freskët dhe të pasur në vlera ushqyese.
Ndiqni më poshtë hapat e thjeshtë të përgatitjes së pastiços në një mënyrë ndryshe dhe shoqërojeni atë me sallata të freskëta të stinës.
PËRBËRËSIT
- 4 kunguj të vegjël të njomë
- 400 gr makarona si ti dëshironi
- 1 lt qumësht
- 4 kokrra vezë
- 100 gr djath kaçkavall
- 50 gr gjalp
- 2 lugë gjelle me miell
PËRGATITJA
Vendosim ujin të ziejë me pak kripë.
Ndërkohë qërojmë kungullin dhe e grijmë në rende.
Më pas në një enë të madhe rrahim vezët me miellin.
Shtojmë qumështin, kripën, më pas hedhim kungullin e grirë.
Kur makaronat të jenë gjysëm të ziera i kullojmë dhe i shtojmë në masën e përgatitur.
Më pas në një tepsi ku kemi shkrirë gjalpin hedhim masën dhe sipër e mbulojmë me djathin e grirë, e fusim në furrë të nxehtë 220 ° për 35 minuta, e lemë të ftohet dhe pastiçja është gati.
