Ministria e Shëndetësisë e Maqedonisë së Veriut, njoftoi se në rast se qytetarët kanë simptoma tipike të koronavirusit të ri (COVID-19), do të mund të lajmërohen tek mjekët e tyre amë.
Në një njoftim në rrjetet sociale, ministria bëri të ditur se qytetarët e vendit do të mund të paraqesin gjendjen e tyre te mjekët amë, në rast se kanë simptoma tipike të COVID-19, si ethe, kollë dhe vështirësi në frymëmarrje.
“Mjekët amë, përmes një ankete epidemiologjike, do të përcaktojnë nëse ju duhet të testoheni apo jo. Nëse është e nevojshme, përmes sistemit ‘Moj Termin’ ata do të caktojnë kohën dhe vendin e saktë të testimit për ju”, tha ministria, duke shtuar se nga dje janë vënë në funskion 14 qendra të testimit në mbarë vendin.
Qendrat e testimit do të njoftohen nëpërmjet sistemit online “Moj Termin”, ndërsa me këtë hap në dispozicion janë vënë afër 1.200 mjekë amë, të cilët do të kyçen në procesin e diagnostikimit.
