Aktivistë të koalicionit “Pro familjes dhe jetës” u bënë bashkë paraditen e sotme në një protestë në sheshin “Skënderbej” , kundër ligjit për barazinë gjinore. Në këtë protestë, u bashkuan edhe qytetarë të shumtë të cilët u shprehën kundër ligjit që sipas tyre cenon familjen dhe fëmijët.
Qytetarët me pankarta në duar, kërkuan që Presidenti Bajram Begaj të mos e dekretojë ligjin “Për barazinë gjinore”.
Aktivistja e koalicionit, Linda Pano në fjalën e saj bëri thirrje për mbrojtjen e fëmijëve. Sipas saj ky ligj prek fëmijët nga mosha 4 deri në 18 vjeç.
“Ky ligj detyron mësimin e edukimit gjinor në shkollë. 77 tradhtarë Shqipëri ta vunë kokën në hi, president mos u bëj i 78”, tha Pano.
Një tjetër aktiviste tha se familja, si institucioni themelor i shoqërisë, po sulmohet nga propaganda ideologjike që ka zëvendësuar arsyen, duke e çuar shoqërinë në një pikë ku duhet të justifikojë identitetet themelore si burri dhe gruaja.
“Familja është institucioni themelor i shoqërisë dhe ligjet duhet të bëhen për ta mbrojtur dhe për ta fuqizuar rolin e saj, edukues të fëmijëve, jo për t’ia cënuar apo marrë asaj këtë rol të pazëvendësueshëm që i është dhënë nga vetë Zoti. Ky ligj dëshmon më së miri se si propaganda ideologjike ka zënë vendin e arsyes, aq sa sot jemi të detyruar të japim arsye sepse gruaja është grua dhe pse burri është burrë”, u shpreh aktivistja.
Ligji “Për Barazinë Gjinore” kaluar në Kuvend pak ditë më parë, por është shoqëruar me diskutime dhe kundërshti nga aktivistë që e kanë cilësuar si ligj anti kombëtar.
