Policia e Tiranës ka finalizuar sot në 24 prill operacionin e koduar “Barriera”, duke arrestuar një person, që po tentonte të shiste armë zjarri.
Efektivët kanë sekuestruar 3 armë zjarri (2 pistoleta dhe 1 armë taktike luftarake). Ai u kap në flagrancë në Tufinë, duke i transportuar armët me automjet.\
Raportohet se 48-vjeçari L.M prej kohësh dyshohet i përfshirë në trafikun e armëve.
Nga armët e sekuestruara, pistoletat do të shiteshin me vlerë 1 mijë e 500 euro secila, ndërsa arma taktike për 8 mijë euro.
Njoftimi i policisë:
Tiranë/Finalizohet operacioni i koduar “Barriera”.
Goditet një rast i tentativës për të shitur armë zjarri.
Sekuestrohen 3 armë zjarri (2 pistoleta dhe 1 armë taktike luftarake).
Arrestohet 48-vjeçari që i posedonte armët, me qëllim shitjen.
Ai u kap në flagrancë, në Tufinë, duke i transportuar armët, me automjet.
Në bazë të informacioneve të siguruara për një rast të posedimit të armëve të zjarrit, me qëllim shitjen, shërbimet e Komisariatit të Policisë Nr. 4 finalizuan operacionin e koduar “Barriera”.
Gjatë operacionit, u vu në pranga shtetasi L. M., 48 vjeç, banues në Tiranë.
Ky shtetas u ndalua nga shërbimet e Policisë, në rrugën “Myslym Keta”, Tufinë, ndërkohë që lëvizte me automjetin e tij.
Nga kontrollet në automjet, u gjetën 3 armë zjarri (2 pistoleta dhe 1 armë taktike luftarake), që dyshohet se ky shtetas i posesonte me qëllim shitjen në zonat “Fresku” dhe “Tufinë”.
Armët e zjarrit u sekuestruan në cilësinë e provës materiale, bashkë me 3 krehra me municion, automjetin që drejtonte shtetasi L. M. dhe celularin e tij.
Në drejtimin e Prokurorisë, vijojnë hetime për të nxjerrë përpara përgjegjësisë penale, shtetas të tjerë që mund të jenë përfshirë në këtë rast.
Materialet procedurale iu referuan Prokurorisë së Tiranës, për veprime të mëtejshme.
