Ministrat e Jashtëm nga Ukraina, Polonia dhe shtetet baltike e bojkotuan samitin vjetor të OSBE-së për shkak të pjesëmarrjes në të shefit të diplomacisë ruse Sergej Lavrov.
Lavrov mbërriti mbrëmë vonë në Shkup në të parën vizitë në një shtet anëtar të NATO-s që nga nisja e agresionit ndaj Ukrainës.
Në Këshillin e 30-të ministror të Organizatës për Siguri dhe Bashkëpunim në Evropë OSBE, po marrin pjesë rreth 1000 delegatë nga 57 vende anëtare të Organizatës dhe vendet partnere.
Lavrov nuk ishte i pranishëm në darkën joformale të ministrave të Punëve të Jashtme si dhe krerëve të delegacioneve të vendeve anëtare të OSBE-së ku mori pjesë edhe sekretari amerikan i shtetit, Anthony Blinken.
Mungoi një takim mes Blinken dhe Lavrov pasi sekretari amerikan i shtetit u nis drejt Izraelit.
Para largimit nga kryeqyteti maqedonas Blinken akuzoi Rusinë se po shkel në mënyrë flagrante çdo parim thelbësor të OSBE-së në përpjekje për të ulur tensionet Lindje-Perëndim.
Gjatë dy ditëve delegacionet do të diskutojnë të ardhmen e OSBE-se nën drejtimin e Maltës si dhe sfidat në kushtet e luftës në Ukrainë.
