Presidenti i Partisë së Lirisë, Ilir Meta shprehet përmes një reagimi në rrjetet sociale se mbahet në izolim për shkak të firmave të ish-Sekretarit të Përgjithshëm të LSI-së, Endrit Braimllari, për çështjen e lobimit. Meta iu përgjigj deklaratave të Braimllarit pasi ky i fundit një ditë më parë deklaroi se nuk i përfshirë në çështjen që tanimë ndodhet nën hetim nga SPAK.
“Unë qëndroj në izolim ekstrem, ndërsa Endriti “gradohet” nënkryetar i Këshillit Bashkiak të Tiranës”, shkruan Meta duke theksuar se kur është firmosur lobimi për llogari të LSI ai ishte President i Republikës.
“Vetëm një “rilindas” mund të harrojë firmat që ka hedhur vetë dhe arsyet për të cilat i ka hedhur. Një gënjeshtar ordiner, që përpiqet të fshihet pas harresës, por e vërteta nuk fshihet as me lojëra fjalësh, as me konvertim teserash partie”, shkruan më tej Meta.
Meta shton gjithashtu se edhe në dokumentet e SPAK, Braimllari faktohet si personi përgjegjës që ka firmosur lobimin.
Postimi i Metës
Endrit Braimllari është shembulli më i gjallë i mënyrës se si SPAK-u arrin t’i konvertojë njerëzit pa karakter në “rilindas” të denjë – gënjeshtarë.
Vetëm një “rilindas” mund të harrojë firmat që ka hedhur vetë dhe arsyet për të cilat i ka hedhur.
Një gënjeshtar ordiner, që përpiqet të fshihet pas harresës, por e vërteta nuk fshihet as me lojëra fjalësh, as me konvertim teserash partie.
Firma për lobimet e LSI-së në periudhën 2018–2019 është e Endrit Braimllarit. Në atë kohë, unë nuk isha kryetar i LSI-së, por President i Republikës.
Për firmat e tij unë qëndroj në izolim ekstrem, ndërsa Endriti “gradohet” nënkryetar i Këshillit Bashkiak të Tiranës.
Apo mos ndoshta është Altin Dumani që gënjen në shkresën zyrtare të firmosur prej tij?
