Presidenti i Partisë së Lirisë, Ilir Meta shprehu sot ngushëllimet për ndarjen nga jeta të gazetarit, shkrimtarit dhe studiuesit të mirënjohur arbëresh Mario Brunetti.
Meta theksoi se do t’i jemi përjetë mirënjohës Brunettit për kontributin e vyer të dhënë për mbrojtjen e promovimin e gjuhës, kulturës dhe traditave Arbëreshe.
“Si përfaqësues legjendar i Arbëreshëve në Senatin dhe Parlamentin Italian do t’i jemi përjetë mirënjohës për kontributin e vyer të dhënë për mbrojtjen e promovimin e gjuhës, kulturës dhe traditave Arbëreshe, por edhe të vlerave të pamohueshme të Luftës Antifashiste, për lartësimin e të cilave ai dha një ndihmesë të jashtëzakonshme si një nga studiuesit e veprës së mendimtarit të madh italo-arbëresh, Antonio Gramshi”, u shpreh Meta në një mesazh.
“Krenar të kemi bashkëpunuar së bashku, kur ushtroja detyrën e lartë të Presidentit të Republikës, për ngritjen e Forumit “U’ jam Arbëresh!”, një nismë që kishte për qëllim të evidentonte, ruante dhe promovonte trashëgiminë kulturore Arbëreshe, pasuri e çmuar e trashëgimisë kulturore të dy vendeve tona”, theksoi Meta.
“Ngushëllimet më të ndjera familjes Brunetti dhe komunitetit shumë të dashur Arbëresh për këtë humbje të madhe e të pazëvendësueshme”, u shpreh Meta.
