Ministria për Evropën dhe Punët e Jashtme dënoi sot me forcë sulmet më të fundit me raketa dhe dronë të ndërmarra nga Irani kundër Emirateve të Bashkuara Arabe, të cilat u vunë sërish në shënjestër të një agresioni të egër.
Me anë të një reagimi, MEPJ, thekson se, këto goditje të paprovokuara ndaj infrastrukturës kritike, përfshirë objektet energjetike, përbëjnë një shkelje të qartë të sovranitetit dhe të së drejtës ndërkombëtare.
Shqipëria qëndron në solidaritet të plotë dhe të palëkundur me EBA, udhëheqjen e saj dhe popullin e Emirateve, si edhe me partnerët tanë në të gjithë Lindjen e Mesme, thekson MEPJ.
Sipas MEPJ, sulme të tilla janë të papranueshme dhe rrezikojnë më tej stabilitetin rajonal.
“Siguria në Lindjen e Mesme ka implikime të drejtpërdrejta për Evropën dhe më gjerë. Prandaj, bëjmë thirrje për përmbajtje, ulje tensionesh dhe një angazhim të ripërtërirë ndaj zgjidhjeve diplomatike”, theksohet në reagim.
MEPJ nënvizon se, Shqipëria do të vijojë të punojë ngushtë me partnerët e saj për të promovuar stabilitetin, paqen dhe sigurinë në rajon.
