Pak ditë pas deportimit të mësuesit turk Harun Çelik nga Tirana, të njëjtin fat mund të ketë dhe një tjetër gylenist.
Bëhet fjalë për shokun e Çelik, Selami Simsek i cili është arrestuar në të njëjtën ditë në Rinas, duke u përpjekur që të kalonte në pikën kufitare të Rinasit me pasaportë kanadeze të falsifikuar.
Simsek dyshohet se ka kërkuar azil politik në Shqipëri, duke ndjekur të njëjtën procedurë si miku i tij i deportuar në Turqi, ndërsa pritet që të ketë seancën e parë në Gjykatë në datën 15 Janar, me gjyqtar Ahmet Metaliaj.
Gjatë ditës së sotme avokati i Çelik, Alban Bengazi, i ka kërkuar informacion Drejtorisë së Kufirit dhe Migracionit ku kërkon të njihet me procedurën e deportimit apo dëbimit që ka marrë kjo drejtori, apo institucioni i Ministrisë së Brendshme.
Në një komunikim për Fax News, Bengazi ka folur dhe për fatin e Simsek, duke thënë se do të kërkojë shtyrjen e seancës në 15 Janar.
“Në 15 Janar do kërkoj shtyrjen e seancës për Selami Simsek, i cili është i akuzuar për falsifikim dokumentesh.
Dosja për Simsek është ndarë nga Harun Celik pasi janë kapur veçmas në Rinas. Akuza ndaj Simsek e ngritur nga prokurorja Anila Galanxhi. Kam dyshime se Simsek do ketë të njëjtin fat si Celik”, është shprehur avokati.
