Google planifikon të sjellë në vitin 2026 syze inteligjente me inteligjencë artificiale (AI), duke u rikthyer në treg pas dështimit të Google Glass në 2015.
Pajisjet e reja pritet të kenë një dizajn më të pastër dhe do të mundësojnë ndërveprim me produktet e AI-së së Google, përfshirë chatbot-in Gemini.
Kompania planifikon të ofrojë dy variante: një model pa ekran, që ofron asistencë dixhitale, dhe një tjetër me ekran të integruar në vetë syzet. Google ende nuk ka dhënë detaje mbi formën finale të këtyre pajisjeve.
Sektori i syzeve inteligjente po rritet shpejt. Meta ka shitur dy milionë syze me AI dhe ka bashkëpunime me markat e njohura Ray-Ban dhe Oakley, ndërsa firma e hulumtimit Counterpoint Research raporton një rritje mbi 250% të shitjeve krahasuar me vitin e kaluar.
Ekspertët e teknologjisë paralajmërojnë Google të shmangë gabimet e mëparshme të Google Glass, që pati probleme me privatësinë, përdorimin dhe dizajnin.
