Gjatë punimeve në Kuvend, nga foltorja e Kuvendit Deputetja e PD, Ina Zhupa iu drejtuar me termin “hajdute”, Ministres së Arsimit dhe Sportit, Manastirliu. Kjo ka shkaktuar debate. Kryetarja e Kuvendit, Elisa Spiropali kërkoi evitimin e fyerjeve.
Ndërkohë, Kryetari i Partisë Demokratike, Sali Berisha, duke marrë fjalën për procedurë denoncoi “brutalitetin me të cilën kryetarja i pret fjalën deputetes dhe proteston për faktin e vetëm se ajo i drejtohet asaj me epitetin që i drejtohet mbarë Shqipëria”.
Berisha theksoi se gjyqi publik ndaj hajdutëve bëhet mbi bazë dokumentesh.
“Në rast se ndonjë njeri këtu në parlament u thotë ‘hajdut’, pa u bazuar në dokumente zyrtare, ju keni të drejtë ta padisni për shpifje. Por, në qoftë se mbi bazë dokumentesh këtu bëhet gjyqi publik i hajdutëve, është bërë, do bëhet, do bëhet dhe do bëhet”, tha Berisha.
Pas debateve, opozita bllokoi foltoren e Kuvendit. Shkak u bë ndërprerja e fjalës ndaj deputetit demokrat Flamur Noka, i cili nuk largohej nga foltorja pa e marrë atë sërish.
Sipas kryeparlamentares, deputeti po përdorte fjalë fyese dhe nuk po fliste për procedurën e rendit të ditës. Pas debateve Spiropali njoftoi 5 minuta pushim të seancës plenare.
