Kryetari i grupit parlamentar të Partisë Socialiste, Bledi Çuçi u shpreh se sot opozita përsëri të njëjtat skena me tymuese në Kuvend, ndërkohë që u miratua buxheti më i madh publik në historinë e këtyre 32 viteve.
Në një prononcim për mediet pas seancës plenare ku u miratua në parim projektbuxheti 2024, Çuçi theksoi se opozita përsëriti të njëjtën skenë, të njëjtin mesazh me tymuese, britma e karrige të hedhura.
“Nuk kishte asgjë të re sa i takon sjelljes së tyre në parlament. E vetmja e re sot është miratimi i buxhetit më të madh publik në historinë e këtyre 32 viteve. Janë 7 miliardë euro, që është dyfishi i buxhetit 2013”, tha ai.
Çuçi shprehu keqardhjen që lufta e brendshme në PD në këtë situatë ku ndodhet opozita ka bërë që të kenë shkëputur fare vëmendjen nga interesi i shqiptarëve.
“Sot pamë të njëjtin skenar për fat të keq, skenat e opozitës në Kuvend. Është buxheti 400 milionë euro për rritjen e pagave, rritja më e madhe në histori ku përfitojnë infermierë, zjarrfikës, punonjës policie etj. Paga mesatare vitin tjetër pritet të shkojë 900 euro. Nuk na intereson fare lufta e brendshme në PD”, shtoi ai.
Sipas Çuçit në këtë situatë duhet të kuptohet se nuk ka krizë parlamenti por ka krizë PD.
“Buxheti është diskutuar me të gjitha institucionet e pavarura, në komisione parlamentare. Nëse opozita vendos të vazhdojë me tymuese ne nuk do ta lëmë Shqipërinë pa buxhet. Ne jemi këtu për mbrojtur interesat e shqiptarëve, të pensionistëve që presin indeksimin e pensioneve jo të Sali Berishës që është pensionisti më i pasur në vend”, tha Çuçi.
