Qeveria u ofron turistëve vetëm shpërthimet me tritol dhe kaosin për lirimin e hapësirave në sezonin turistik, thotë kryetari i PD, Sali Berisha.
Teksa komentoi shembjen e objektit në Vlorë nga Inspektoriati Kombëtar i Mbrojtjes së Territorit, pasi nuk kishte respektuar rregullat e ndërtimit, kryetari i PD thotë se veprim i tillë dëmton turizmin në vendin tonë.
“U ofron banorëve të Urikumit dhe turizmit që mund të jetë aty, pushuesve që mund të jenë aty, terrorin e 32 kilogramëve tritol, zhurmën në kulmin e turizmit. Këtë, mund ta bëjë vetëm një njeri që quhet Ramaduro”
Aksionin për lirimin e hapësirave publike në Theth e cilësoi përsëri si një hakmarrje e qeverisë pasi nuk u votua nga banorët në zgjedhjet e 11 majit.
“Thethi rrafshohet për herë të parë nga një armik i betuar i Thethit, i Shkodrës, i veriut, i Kosovës, që ka emrin Edi Rama.”
Solli përsëri në vëmendje çështjen McGonigal, duke thënë se Kryeministri Rama po mbrohet nga SPAK, që nuk heton rolin e tij ne korrupsion.
“McGonigal u pagua nga zyrat e Edi Ramës për të kryer misionin e tij kundër opozitës. Me gjithë këto, Altin Troplini, ky mercenar që s’ka ligj e as moral, mban në sirtar dosjen e McGonigal prej dy vitesh”
Dhe pse shprehet mosbesues ndaj drejtësisë shqiptare, shpreson në një hetim nga autoritetet amerikane për dosjen McGonigal.
“Kam besim të plotë se FBI po e riheton rolin e McGonigal. Jam i bindur se komponenti shqiptar i kësaj dosje do hetohet dhe se Altin Troplini nuk do mund të fshehë kurrë aktivitetin kriminal të Edi Ramës dhe McGonigal në Shqipëri”
Rrethimin nga forcat policore dhe ndërprerjen e sinjalit të televizionit News24, e cilësoi të pa bazuar në ligjet e vendit.
“Nuk ka absolutisht asnjë bazë ligjore rrethimi, ndërprerja e sinjalit, këputja e kabujve të transmetimit që Edi Rama ka realizuar këto tre ditë ndaj këtij televizioni”
Kryedemokrati thotë se kundërpërgjigja ndaj qeverisë do të vijë vetëm nga mobilizimi i qytetarëve dhe opozitës.
