Autoriteti Kombëtar i Ushqimit (AKU), në kuadër të garantimit të sigurisë ushqimore dhe respektimit të legjislacionit, ka ushtruar kontrolle në disa subjekte që tregtojnë Produkte për Mbrojtjen e Bimëve (PMB) në qarkun e Beratit.
Gjatë kontrolleve të zhvilluara nga trupat inspektuese të Drejtorisë Rajonale Berat, u inspektuan 8 subjekte, ku si rezultat i shkeljeve të evidentuara u vendosën 3 masa administrative me paralajmërim për shkelje të lehta. Ndërsa ndaj 1 subjekti që tregtonte PMB pa licencën përkatëse, u mor masa administrative me gjobë dhe u vendos bllokimi i aktivitetit deri në përmbushjen e kritereve ligjore.
AKU njofton se do të vijojë me kontrollet në të gjithë vendin për të siguruar respektimin e rregullave dhe për të mbrojtur shëndetin e konsumatorëve dhe integritetin e zinxhirit ushqimor.
“AKU garanton se do të jetë e palëkundur në përmbushjen e detyrës për të siguruar standardet dhe rregullat që lidhen me sigurinë ushqimore dhe tregtimin e produkteve bujqësore”, thuhet në njoftimin zyrtar të AKU-së.
