Gjykata e Korçës ka ndryshuar masën e sigurisë për 3 persona, lidhur me ngjarjen e rëndë ku mbeti i vrarë 42 vjeçari Egli Proga.
Mësohet se Voltan Shkullaku, Arian Manellari dhe Leonidha Guçe kanë qenë të pranishëm në vendin e ngjarjes. Por sipas njoftimit zyrtar të policisë, ata nuk kanë kallëzuar krimin.
“Seksioni për Hetimin e Krimeve ndaj Personit ka bërë ekzekutimin e urdhrit të Prokurorisë për ndalimin e shtetasve: V. Sh., 40 vjeç, A. M., 55 vjeç, dhe L. G., 47 vjeç, banues në Pogradec. Gjykata e Shkallës së Parë Korçë, ka ndryshuar masën e sigurisë nga “Detyrim paraqitje në Policinë Gjyqësore”, në “Arrest në burg”, për veprën penale “Veprime që pengojnë në zbulimin e së vërtetës”, për ngjarjen e ndodhur në lagjen nr. 1 Pogradec, ku humbu jetën shtetasi E. P., 42 vjeç. Këta shtetas kanë qenë të pranishëm kur ka ndodhur ngjarja dhe nuk kanë kallëzuar krimin duke penguar zbardhjen e së vërtetës”, njoftojnë blutë.
Kujtojmë se Proga u vra më 10 Gusht 2024 jashtë lokalit të tij në Pogradec.
Si autor i vrasjes është arrestuar 29-vjeçari Denis Meçi një ditë pas ngjarjes.
