Kryetari i grupit parlamentar të Partisë Socialiste, Niko Peleshi reagoi sot, pas cenimit fizik të deputetes së mazhorancës, Milva Ekonomi, nga deputetët e përjashtuar të opozitës, Xhelal Mziu dhe Ina Zhupa.
Deputetët e opozitës nuk lejuan Ekonomin të marrë pjesë në punimet e komisionit hetimor për Shëndetësinë.
“Pas përpjekjeve të dhunshme të PD-së për të penguar punimet e seancës plenare dhe sulmet me molotov ndaj institucioneve, sot është tejkaluar çdo kufi me cenimin fizik të deputetes së mazhorancës, Milva Ekonomi, nga deputetët e përjashtuar të opozitës, Xhelal Mziu dhe Ina Zhupa”, u shpreh Peleshi.
Opozita, sipas tij, po tenton të sjellë krizën e vet edhe në Kuvend.
“Dhuna ndaj deputetëve, stafit të Kuvendit, Gardës apo Policisë është absolutisht e papranueshme dhe e dënueshme”, shtoi Peleshi.
Peleshi i bëri thirrje deputetëve të Partisë Demokratike të rikthehen në rrugën e arsyes dhe të dialogut.
“Dhuna dhe përpjekjet për të bllokuar punën e Kuvendit nuk i shërbejnë as qytetarëve, as demokracisë”, theksoi ai.
Deputetët e opozitës janë të përjashtuar nga Kuvendi për shkak të akteve të dhunës në seancë plenare dhe nuk janë lejuar të hyjnë në komisionin hetimor. Kryetarja e këtij komisioni hetimor për Shëndetësinë hyri në mbledhje ku pati debate të ashpra me nënkryetarin e komisionit, Plarent Ndreca.
