Në drejtimin e zëvendëskryetares Etilda Gjonaj, komisioni për Çështjet Europiane shqyrtoi dhe miratoi projektligjin “Për disa ndryshime dhe shtesa në ligjin “Për shërbimin veterinar në Republikën e Shqipërisë’.
Zëvendësministri i Bujqësisë dhe Zhvillimit Rural Arjan Jaupllari, u shpreh se ndryshimet e rëndësishme në ligjin për Shërbimin Veterinar synojnë përmirësimin e cilësisë dhe sigurisë së produkteve mjekësore veterinare, rritjen e përgjegjësisë dhe efikasitetit të autoriteteve veterinare dhe harmonizimin me standardet e BE-së.
“Synojmë një ridimensionim tërësor të shërbimit veterinar në Shqipëri. Këto janë procese që ne po i ndërmarrim në mënyrë që hap pas hapi të shkojmë drejt standardizimit të sigurisë ushqimore në Shqipëri me atë europiane”, tha ai.
Ndryshimet ligjore garantojnë gjurmueshmërinë në të gjithë zinxhirin ushqimor dhe këto risi ligjore reflektojnë 15 propozime të grupeve të interesit dhe aktorëve të fushës që iu përgjigjen nevojave aktuale që paraqet sektori.
Gjithashtu, kuadri i përmirësuar ligjor i mundëson prodhuesve të rrisin prodhimin ndërsa do të lehtësohen dhe barrierat administrative për regjistrimin e barnave veterinare të importit.
Pas diskutimeve, anëtarët e komisionit e miratuan këtë projektligj Nen për Nen dhe në tërësi, sipas ndryshimeve të dakordësuara gjatë diskutimit.
