Mbi 130 persona kanë vdekur nga një tërmet i fortë në Nepal, sipas policisë në kryeqytetin Katmandu, me dhjetëra të tjerë janë plagosur.
Një përfaqësues i administratës lokale në Jajarkot, pranë epiqendrës së tërmetit, tha se numri i viktimave ka të ngjarë të rritet.
Shifra të konfirmuara për vdekjet apo plagosjet nga disa pjesë të tjera të rajonit malor nuk ishin fillimisht të disponueshme.
Sipas matjeve të Qendrës Kombëtare të Monitorimit të Tërmeteve (NEMRC), tërmeti ka qenë me magnitudë 6,4 ballë Rihter dhe ka ndodhur në orën 23:47 (18:02 GMT).
Shërbimi Gjeologjik i SHBA-së e vlerësoi magnitudën në 5,6 ballë.
Zona përjetoi të paktën tre pasgoditje në orën në vijim me magnitudë të paktën 4,2 ballë.
”Tërmeti u ndje edhe në veri të Indisë, përfshirë kryeqytetin Nju Delhi”, raportuan ”Times of India” dhe media të tjera indiane.
Rajoni i Himalajeve, ku ndodhet Nepali, është gjeologjikisht jashtëzakonisht aktiv.
Pllaka kontinentale indiane po zhvendoset nën pllakën euroaziatike me një shpejtësi prej rreth dy centimetra në vit, gjë që vazhdimisht çon në tërmete të forta.
Nepali përjetoi një tërmet veçanërisht të rëndë në vitin 2015, i cili tronditi zonën përreth kryeqytetit Katmandu dhe shkaktoi shembjen e ndërtesave të shumta.
Rreth 9 000 persona humbën jetën dhe miliona mbetën të pastrehë.
