Drejtësia do të vendoset kur udhëheqja shtetërore dhe ushtarake ruse të shpallet përgjegjëse për luftën që filloi kundër Ukrainës, tha presidenti Volodymyr Zelensky, në kuadër të një konference ndërkombëtare për këtë çështje, që u zhvillua dje në Lviv.
“Dhe kur ata të shpallen përgjegjës, atëherë drejtësia do të rivendoset”, tha Zelensky në fjalimin e tij video.
Zelensky theksoi “përgjegjësinë e Rusisë dhe udhëheqjes së saj – përgjegjësinë personale – për agresionin dhe terrorin kundër vendit tonë dhe popullit tonë”.
Ukraina është përpjekur prej muajsh të formojë një gjykatë ndërkombëtare, ku liderët e Moskës do të përgjigjen për krimet e luftës.
Në takimin në Lviv morën pjesë përfaqësues të nivelit të lartë të Evropës dhe SHBA.
Siguria ishte e rreptë dhe u dha pak informacion.
“Ne po mbledhim mbështetjen maksimale për gjykatën për agresionin rus kundër Ukrainës”, tha Zelensky.
“Ne po bëjmë gjithçka për të siguruar që Gjykata Penale Ndërkombëtare të jetë e suksesshme në ndëshkimin e kriminelëve rusë të luftës dhe që autoritetet tona kombëtare të zbatimit të ligjit dhe gjyqësor të sigurojnë dënime të drejta kundër të gjithë vrasësve dhe torturuesve rusë”, theksoi ai.
