Kërkohet një pension i trembëdhjetë i AHV/VSA (pensioni i moshës dhe trashëgimisë) – ashtu sikurse paga e muajit të trembëdhjetë që e ndajnë shumica e punëdhënësve në Zvicër.
Ky është qëllimi i një iniciative federale popullore që e kanë filluar sot zyrtarisht sindikatat e ndryshme të Zvicrës.
Qëllimi i iniciativës është që personat të cilët marrin AHV-në të marrin po ashtu një shtesë vjetore, ngjashëm me të punësuarit.
Por, kjo pagesë shtesë nuk duhet të rezultojë në ulje të përfitimit plotësues (EL) që mund të marrin pensionistët.
Sindikatat argumentojnë kështu: Pensionet e AHV-së në gjendjen që janë aktualisht, nuk tregohen të mjaftueshme për një jetë normale.
Ndërsa një pension i 13-të në AHV do të bënte që të përfitonin pensionistë që kanë punuar në degët ekonomike të paguara dobët dhe sigurisht, gratë.
