Kur je gjithmonë në kërkim të recetave të reja, arrin të zbulosh metoda të ndryshme për gatimin e pjatave tradicionale.
Një nga traditat e kuzhinës shqiptare pa dyshim është edhe përgatitja e pispilisë.
Shumë nga ne e kanë përgatitur në të gjitha llojshmëritë e saj, duke nisur nga spinaqi e deri tek ajo me qepë të njoma.
AgroWeb.org ju sjell sot një recetë pak më të veçantë për pispilinë, atë me kungulleshka.
Duke qenë se sezoni i kësaj perimeje po afron, receta të tilla na hyjnë në punë të gjithëve.
Në shumë pak kohë do të keni përgatitur një pjatë vërtet unike, dhe që do të kënaqni shijen e të gjithë të dashurve tuaj.
Përbërësit
400g kungulleshka të vogla
3 vezë
2 gota uji me miell gruri
1 gotë uji me miell misri
120 ml qumësht
2 lugë çaji me kripë
100ml vaj ulliri
300 g gjizë pa kripë
Përgatitja
Pasi të keni larë me ujë të bollshëm kungulleshkat grijini imët me rende.
Shtrydhini lehtë me duar për t’i hequr pak nga lëngu i tyre, por jo të gjithin pasi do të duhet për brumin.
Lërini kungulleshkat mënjanë dhe ndërkohë përgatisni brumin.
AgroWeb.org ju këshillon që të merrni një tas të madh dhe aty të hidhni vezët, vajin dhe qumështin.
Rrihini derisa të formoni një masë të njëtrajtshme dhe më pas shtoni kripën dhe miellin e misrit.
Punojeni përzierjen sa mielli i misrit të jetë tretur, kështu do të keni përfituar një brumë të hollë.
Tani është momenti që të shtoni gotën e parë të miellit të grurit.
Hidhni gjizën duke e thërrmuar pak me duar si dhe gotën e mbetur të miellit të grurit.
AgroWeb.org ju këshillon që brumi duhet të jetë në trashësinë e brumit të kekut.
Në fund shtoni kungulleshkat e grira dhe përzjejeni dimë.
Nëse brumin e shikoni që është pak më i fortë, shtoni pak nga lëngu i kungulleshkave që ruajtët në fillim.
Merrni një tavë dhe lyejeni mirë me vaj dhe aty kaloni brumin që përgatitët.
Futeni për ta pjekur në furrë të ngrohur me 200 gradë për 30 minuta, ose derisa sipërfaqja e tij të jetë e artë.
Shërbehet i ngrohtë duke e shoqëruar me sallata të ndryshme me perime të freskëta, me turshi, apo tarator me kastravecë.
