Dy persona janë ekstraduar nga Greqia, pasi ishin dënuar për vepra të ndryshme penale, njëri për vrasje dhe tjetri për vjedhje. Mësohet se i ekstraduar është shtetasi Petrit Buzi, 47 vjeç.
Ky shtetas është arrestuar nga autoritetet policore në Athinë, në mars 2019, me qëllim ekstradimin drejt Shqipërisë, në zbatim të urdhër-arrestit ndërkombëtar të nxjerrë nga Zyra Qendrore Kombëtare Interpol Tirana, pasi Gjykata e Rrethit Gjyqësor Fier, në vitin 2005, e ka dënuar këtë shtetas me 16 vjet burgim, për veprën penale “Vrasja me paramendim, e kryer në bashkëpunim”.
NGJARJA
Më datë 25 mars të 2004-ës, ky shtetas, në bashkëpunim me tre shtetas te tjerë, ka vrarë shtetasin me inicialet N. H., në fshatin Kallm i Madh, Fier.
Po ashtu, drejt vendit tonë u ekstradua dhe shtetasi shqiptar T. Sh., alias T. S., alias E. P., 34 vjeç. Ky shtetas ishte shpallur në kërkim, pasi në maj 2018 Gjykata e Rrethit Gjyqësor Fier i ka caktuar masën e sigurisë “Arrest në burg”, për veprën penale “Vjedhja me dhunë”.
PËRMBLEDHJE E NGJARJES SË NDODHUR:
Më datë 06.04.2018, në poliklinikën e specialiteteve në Fier, ky shtetas ka hyrë në zyrën e shtetases L. A. dhe i ka vjedhur nga çanta e saj portofolin dhe kartën e bankës. Nga hetimet e kryera ka rezultuar se autor i kësaj ngjarjeje është shtetasi T. Sh.
