Në disa qytete të Shteteve të Bashkuara vazhduan të dielën protestat kundër dhunës policore dhe racore ndaj afrikoamerikanëve. Përplasje u regjistruan edhe përpara Shtëpisë së Bardhë.
Protestuesit që demonstrojnë për vdekjen e afroamerikanit Xhorxh Floid e zhvendosën të dielën revoltën e tyre përpara Shtëpisë së Bardhë.
Policia përdori gaz lotsjellës, spraj irritues dhe bomba tymuese për të ndarë turmën e mbledhur para godinës presidenciale teksa ndiznin zjarre dhe qëllonin me gurë drejt kordonit të sigurisë.
Nga ana e tyre, demonstruesit brohoritnin mesazhet “jeta e afroamerikanëve vlen”, “mos qëlloni” dhe “pa drejtësi nuk ka paqe”.
Kryeqyteti i vendit dhe rreth 40 qytete të tjera solli në fuqi gjendjen e shtetrrethimit duke nisur mbrëmja.
Në natën e gjashtë të trazirave, u raportuan disa raste të përplasjeve mes policisë dhe protestuesve.
Pasi nisi paqësisht, një demonstratë në Boston përfundoi me përdorimin e shkopave të gomës dhe djegien e automjeteve të policisë.
Në shtetin e Pensilvanisë, në Filadelfia, dhe në Los Anxheles, banorët plaçkitën bizneset duke nxitur edhe presidentin, Donald Trump, të apelojë për ndaljen e incidenteve kriminale përndryshe do thërriste ushtrinë.
Në Mineapolis, shoferi i një kamioni nuk frenoi para turmës që kishte bllokuar autostradën e qytetit.
Mjeti u ndal pas rrethimit nga të pranishmit ndërsa shoferi u nxor jashtë duke u dhunuar edhe fizikisht, përpos arrestimit nga policia.
Në qytetin e Denverit në shtetin qendror të Kolorados me mijëra qytetarë marshuan paqësisht me duart prapa duke thirrur “nuk marr dot frymë”.
Këto ishin ndër fjalët e fundit që shqiptoi 46-vjeçari Xhorxh Floid para se të humbiste jetën pas asfiksimit gjatë arrestimit nga policia, ngjarje e cila ka ngjallur një valë rebelimi me ngjyrime politike dhe racore kudo nëpër Shtetet e Bashkuara të Amerikës.
